عين بنادم! (زجل مغربي) بقلم الشاعر المبدع محمد دومو
!
(زجل مغربي)
(زجل مغربي)
جماعة ت الناس فالطريق
واقفة، تحنزز بلا شغل
وعليا ݣالو:
شوف هذا مالو!!
بالتوشويش ولمعاني
سمعت لكلام من بعيد
عيون قاسحة حديد
فاللحظة تفاجأت وخفت
ارتبكت من لفعال ودخت
وݣلت فراسي:
مال هاذو عاود ثاني؟!
لا حد سمع كلامي
بالتلميح فهموا المعاني
حرت كثير..
وݣلت فخاطري:
آش غادي ندير؟!
آش يصلح مع هاذ العيون؟!
واش المعمول؟
وآش ممكن يحصل ويكون؟
تخطف عقلي وتاه
وفرمشة عين أصبحت مسحور
لكن احضر ايماني
وزݣيت عقلي وافكاري
ك يݣلو: العين حق!!
ما ݣلت عليها والو..
وليوم أنا ميقن ومتحقق
راه العين ك تقيس الناس
وتفعل لغرايب فالراس
وتصيب الواحد بالوسواس
راه العيون تشطن لعقل
وتحرك ديما الإحساس
كلمة العين حقيقة
وفهامة المعنى صعيبة
كثروا الفقهاء فهاذ الزمان
كلا يلغي بلغاه!!
وبتفسيرو كيبان فواح
يعلم الله آش من معنى ليها!
راه العين تجعل الإنسان منوي
حاير والشك ف راسو
ما يبقى مركز ولا حاضر
هايم بلا عقل وسارح
وملي يعثر فالطريق ويطيح
يݣول هاذ العين عثرتني
واللومة ديما عليها
يتملص من فعايلو المسؤولة
وينسى بلي عقلو كان ساهي
مشطون بعيون ذاك الحاضي
هكذا بشوفة العين يتأثر
ما يبقى مركز ولا حاضر
هكذا ك نفسر أنا المعاني
وهاذ التوضيح آخر كلامي
وكلا يفسر على حسابو
كيفما بغا وكيفما يحلى لو
-بقلم: محمد دومو
-مراكش/ المغرب
تعليقات
إرسال تعليق