واش غير نݣول؟! (زجل مغربي) بقلم الشاعر محمد دومو
واش غير نݣول؟!
(زجل مغربي)
واش غير نݣول؟!
ولا نتساخر اللور؟!
نݣول لي فݣلبي مستور
و لي حارݣني من الجدور
راه كلشي سد فمو
ومشى فحالو يدور
ما بقى حد معايا موجود
معامن غادي نبدا نثور
واش غير نݣول؟!
راه خيابت المعيشة
فين مشى ذاك المعقول؟!
ما بقى غير الفضول
أكثر التبرݣيݣ بيناتنا
والغشاش يصول ويجول !
كثرة ݣول فيا أنت،
وأنا فيك غادي نݣول!
راه طفات الشمعات ف زمانا
ما بقات قصارة ولا نور
وكثر بزاف فحياتنا
النفاق وشهادة الزور
الله يحفظ سلوكنا
من فعايل كل محساد
ومن لحقد بنواعو
و شر لغدر ولعناد
فين مشى لكلام الزين
تبدل اليوم غير بالغل..
وسارح حتى ال فين!
واش غير نݣول؟!
ولا نتساخر اللور؟!
شلى من كلام…
باقي غير مستور!
وشلى من واحد مگدم
غادي فحياتو مجرور!
دابا غير نتساخر
راه ظهرت المعنى
نسكت وبلا ما نݣول
كلشي مشى وتجلى
الأولاد وحتى البنات
ولفو الطيش والعرى
قابلو غير التخدير
وكلشي فيهم تبلى
-بقلم: محمد دومو
-مراكش/ المغرب
تعليقات
إرسال تعليق