دَاَ حِلم أَوَانطه بقلم الشاعر محمد عنانى
دَاَ حِلم أَوَانطه
بقلمي محمد عنانى
نِمت ف يوم وحلمت بإنى بأَقِب وأعيش
لابس لبس ذواتي وقيمه موش من خِيش
ساكن فيلا فى مكان راقى ما تقوليش
وسِبت العِشه إلا انا بأسكنها وسط الهيش
جوا الفيلا سُفره كبيره وياَ كراَسى معاهم نِيش
أوَض النوم مراتبها ناعمة إيشي سفنج وإيشى ريش
عندى كمان أحدث عربيه قول مرسيدس أومِيسوبيش
ليها شُفير مِتعلم أفندى زى زمان أهل الطرابيش
يوماتي ياخدنى لأجدع مطعم أطلب رومى وكباب شيش
في الآخر لما أكل وأشرب من جيبى أدفع بقشيش
وأنا فرحان في الحلم كَإنىِ في الجنه طاير وبأعيش
فجأه صِحِيت على صوت حَيَاَنِى قوم يا منَيِل هات العيش
قومت بسرعه روحت وجِبته وكمان فول وياه تحابيش
وأكلنا وطلبنا الستر هوا صاحبنا وغيره مافيش
أما الحلم دا كله أونطه موش عاوزه وما يِلزمنيش
وأنا بالواقع رغم مرارته حَاأتكيف وياه وحاأعيش
وأسعا وأحاول أحسن وضعى بس حلال من غير تناتيش
وماليش دعوه باللي حياته أساسها الرشوه والتهبيش
مالها العيشه بستر وصحه وسط الفقرا والحرافيش
تعليقات
إرسال تعليق