حكيم البوح بقلم الشاعر.. محمد دومو
حكيم البوح!
(زجل مغربي)
صاحب المعنى حاظر... مول زين لكلام
حكيم البوح الرزين...لي ما يوقفو ݣوال
يطرب لمسامع بجديبو…ونغامو تلقصايد
معاني حكيمة موزونة… كتحير لعقول
مهووس بحكاية لكلام... فلعلالي سارح
ينشد حروف باينة... دوى لكل لمجروح
بهالي ومهور ݣالو... وصفوه كل لعباد
ينظم ما يعير ال غير... بكلامو محكوم
هكذا فزمان الغش عايش… حالة كل فنان
ومول لعقل الخاوي... ديما تلقاه ميسور
الذوق بجناحو فرفر… وهاجر لوكار
طير حافظ يغرد... بحال ولد موقنين
صبح لمرار فيامنا... يتغرغر فلفام
تغير الذوق لمنسم... وصبح لمرار بديل
ما يهمك صنطيح باين... بالجبهة بارز
ملي تسمع لكلامو... لا معنى فيه تفيد
مخبي شلا ݣوال... مليح النضم ومساخر
والعيان ديما يتقدم...وخى غير منطيح
لا حيلة مع الناس تفيدك...غير كلامك يا فلان
الضامة صنعة لمعلم... لي ديما كيضيم
النظم وزن وفصاحة... موهبة تالرحمان
ما هي ورث سلالة… ورثوها من قديم
ݣول كلامك وتساخر... ولاخر يݣول لكلام
ميزان لودن بيناتنا...يكون لينا حكيم
شحال من غراب تسرفق... ݣال اصلو حمام
تلف المشية ديالو...وبقى تالف حزين
لمنافسة زينة ديما… بلا بغظ تكون يا فلان
تنفع البوح ويترقى..ويولي كلامنا زين
-بقلم: محمد دومو
-مراكش/ المغرب..
تعليقات
إرسال تعليق