سنين الغربة بقلم الشاعر... أحمد المصري
#سنين الغربة
بقلم فارس الكلمة
أحمد المصري
سنين الغربة صعبة
والله يا خلق صعبة
معاها راح شبابنا
والبسمة تمنها غُربة.
والله نفسي أرجع
وأبوس عيالي وأشبع
دي وشوشهم هي مالي
صدقني أنا نفسي أرجع.
بس الحياه دي مُره
والحال جوا وبره
بقا عامل زي سيرك
والفُرجة علينا حُره.
بلياتشوا عمال يضحك
وأحنا كمان بنضحك
والهمّ جوا ساكن
مش عارف حتى يضحك.
محروم مربوط في ساقية
والناس فكرنها رايقة
بنعبي في الشكاير
والله دي خلق فايقة.
فاكرين الغُربة شنطة
والله دي ناس أونطة
دي الغُربة شيب مُبكر
ولو شغال في طنطا.
العين علينا ديماً
وخصوصاً أُم أيمن
لوكلوك فاكرها زيطة
سكت أُمك يا أيمن.
وأحكلها عن شَقانا
صعبة الغُربة معانا
لو سهلة كان زمنا
البَلية لعبت معانا.
وفكرها بقسط شادي
خد شقة في المعادي
وحبسوه علشان مفيش
وشادي عمال ينادي.
يا خلق ما تلحقونا
طالع ميتين أبونا
علشان شقة وبيت
ياالقسط يا ترفعونا.
طب كنتوا لمتونا
بدل ما تغربونا
ونقعد مع العيال
نُقعد بس راضونا.
شغل يكفي العيال
ويكفي أُم العيال
هو الموضوع بسيط
مهوش بكُتر مال.
سمعاني يا أُم أيمن
الغُربة تمنها أيمن
الغُربة تمنها مُر
أأقروا الفاتحة لأيمن.
بقلم فارس الكلمة
أحمد المصري
تعليقات
إرسال تعليق